I grosse Schritte chunnt de erst Jahrestag vom Unfall vom Remo uf üs zue. De Tag chunnt usgrächnet id Advents und Wynachtszyt, das machts dopplet schwär. I weiss nid wie de de Silväster wird – i cha mier das im Momänt no nid vorstelle wie i und mini Familie de reagiert. I weiss nume, dass das nid grad eifach wird wärde.
Ja, scho bald isch es 1 Jahr här, wo mi das unvergässliche Telefon vor Polizei het us em Schlaf grisse, de Schrecke, Ungwüssheit was genau passiert isch, wies em Remo geit, isch er verletzt, viellicht sogar schwär. Dr Ysatzleiter het mer gseit es gsehd nid guet us, si sige no dranne! Mier isch düre Chopf gange wär ächt no dranne isch, d`Füürwehr wüll de Remo yklemmt isch, oder ds`Retterteam wo ihm hilft, oder gar miner Kollege vor Basis Gsteigwiler mit dene i so oft sälber bi so Ereigniss bi derbi gsi?? So viel isch i wenige Sekunde dür mi Chopf gschosse! Dr Ysatzleiter het gseit mier sölle rasch i Chrattiggrabe cho!
De Chrattiggrabe wo i scho mängisch ha müesse zu schwäre Unfäll gah. Es paar chöme mier blitzartig i Sinn.
I gspüre i mier inne es betäubends Gfüehl dass öppis passiert isch wo sehr yschnidend wird si! I ha versuecht de Gedanke wo mier z`gspüre het gä, dass de Remo chönnti tödlich verletzt si us mim Chopf zverbanne. Vo Minute zu Minute isch es mier immer klarer worde, dass mier üs wahrschinlich mit öppis vom unvorstellbarste müesse usenandsetze.
Mier hei üs hastig agleit u mier hei üs bi Schneetriebe uf de ungwüssi, schwär Wäg richtig Unfallstell gmacht. Hoffnig, Verletzigsmuster, Tod, wievieli anderi junge oder älteri Mönsche si no beteiliget, het üs z`fahre nid eifach gmacht, zudem isch es glatt gsi uf dr Strass. Was chame mache, dass mier zu Informatione chömme, di Ungwüssheit het üs fasch erdrückt. Do chunnt mer d`Sinn, dass mi Fründ Andreas Berger Dienst het fürs Spital, de muess wüsse, wenn öpper verletzt im Spital agmeldet isch. So han i ihm churz nach de Viere am Morge aglütet u ihn mit üsere Sitiuation konfrontiert. Aer het vo nüt gwüsst, het sich aber d`Müeh gmacht uf dr Notfallstation ds`Interlake zfrage ob üse Rettigsdienst underwägs sigi. Churzi Zyt später het är zrugglütet u üs gseit, dass in Interlake niemer öppis vomene Unfall wüssi. Yschalt isch es mier nach dem Telefon de Rücke ab gloffe, für mi isch es immer klarer worde, dass mier üs uf ds`Schlimmste müesse gfasst mache, aber i wellem Umfang?? I dr Zwüschezyt si mier scho uf dr A8 richtig Därlige underwägs gsi u si hinderem Salzwage nahgfahre. Isch ächt ysig gsi, ds`schnäll gfahre oder beides oder, oder, oder? Wie mängisch hei mier als Familie über Unfäll u Schicksal gredt, nachdem i vo Rettigsysätz bi hei cho, wie viel mal hei mier üs versucht ds`vorstelle, wies ächt dene Aghörige vo de Opfer geit? Wie mängisch hei mier drüber gredt wie das wär, we das einisch di eigeti Familie, es eigets gliebts Chind würdi träffe! U itzt steit irgend so öppis vor üs und mier wüesse immer no nüt definitivs.
Es isch sehr still gsi uf dr Strass, de Leissigetunnel isch gsperrt gsi und gäge Milchbar isch es Gspänstig ruhig gsi. I ha mier vorgstellt dass mer de d`Liechter vom Rettigswage, vo de Füürwehr oder gar Positionsliechter vom Regaheli gseht, aber nüt het sich zeigt. Hoffnig, Hoffnig hei mier gha; au do wo mier hei müesse üses Auto ahalte wüll mier im Chrattigrabe si acho. Mier si usgstiege u sofort si üs im Marco siner Rettigskollege vo Gesige entgägecho. I ha ade Gsichter a geseh, dass de Remo nümme läbt, aber immer no isch es e paar Sekunde gange bis üs d`Rettigssanitäter di letschti Hoffnig gno hei u üs i d`Arme hei gno! Es isch unbeschrieblich, was mier als Dad und em Uschi als Mami für Gfüehl überfalle hei, es isch unvorstellbar, was i somene Momänt uf eim zuechunnt.
Mier hei no nüt gseh vor Unfallstell, mier hei no nüt gwüsst was passiert isch u wievieli witeri Opfer dass es no gä het, chöi mier de Remo no luege, oder isch är entstellt, wie viel mal hani so schrecklichs müesse aluege. I ha zum Uschi gseit i go elei go luege u tue de Entscheide öp du au chasch cho, mier isch es wichtig gsi, dass Remos Mami ihn eso cha i Errinnerig bhalte wie är isch gsi. Vo witem han i ihn gseh ligge z`mitts uf dr Strass, zuedeckt mit ere mier bekannte Decki. I bi uf e Remo zueglüffe, ha Decki ufglüpft ohni mier ds`üeberlege was i itz de grad gseh. U itz geseh i ds`Gsicht vom Remo, wenn i müesst e Beschriebig mache, de würde i säge er het es Lächle uf em Gsicht gha, genau eso wie mier ihn 20 Jahr lang immer hei dörfe erläbe. I ha ihn i mini Arme gno, ha grännet u gseit nei, nei, das darf nid wahr si u ha im e Muntsch gä u im gseit, dass i ihn lieb ha. De bi ni go ds`Uschi hole, und zäme hei mier üse gliebti Remo i d`Arme gno. Hei ihm no einisch gseit, wie stolz mier uf ihn si u wie ulieb mier ihn heige! Mier hei de Remo i dem Momänt ganz bewusst und mit grosser Hoffnig losglah u hei ihn uf di anderi Site vom Läbe la gah. Uf das si mier innerlich e Momänt echli ruhiger worde, und hei au echli Dankbarkeit gspürt, dass mier hei dörfe d`Eltere si vo so emne spezielle, fröhliche ufstellte „Bueb“.
Isch das Würklichkeit oder e Troum – i chas nid beschriebe was üs als düre Chopf isch gange. Was u wie säge mier das dr Andrea u em Marco, de Grosseltere, sine vilne Fründe u em Däni?
Was passiert i de nächste Stunde, wo muess de Remo no häre, was isch eigentlich passiert, wo isch si Fründ Franco wo isch bi ihm im Auto gsi?
Dr Rettigssanitäter het gseit, dass es im Franco sowit guet göchi u är praktisch unverletzt sigi und dass är mit dr andere Ambulanz zur Kontrolle ids Spital z`Thun bracht sig worde. Es sige witer e keiner anderi Mönsche diräkt i de Unfall verwicklet. E grossi Dankbarkeit hei mier gspürt, dass nid no anderi Lüt si verletzt oder gar ums Läbe cho! Es isch es grosses Wunder, dass de Franco überhaupt no gläbt het.
Ds`Uschi isch mit de Rettigslüt uf e Stützpunkt Gesige gfahre, u i bi ar Unfallstell blibe.
Jetz hani versucht d` Andrea in Californie ds`erreiche. Vor Zyt här isch es günstig gsi u so hani si dehei gfunde u es isch gloub ds`schlimmste gsi ire d`Wahrheit z`säge was passiert isch! I ha gspührt, wie uf der andere Site vor Aerde e Wält isch zämmebroche u wie fescht dass das üsi Andrea het troffe. 4 Mal isch dr Remo bi ire in Californie gsi und si hei e bsunderi Verbindig gha. Afangs Januar 2004 het dr Remo wieder wölle si gliebti Schwöschter go bsueche!
Aebe so schwär isch es für ds` Uschi gsi em Marco d`Wahrheit ds`säge! Au für ihn isch e Wält zämebroche. I ha in ersch echli später gseh nachdem i ar Unfallstell bi fertig gsi. Bsunders schwär für de Marco isch gsi, dass är ar Wynacht mit em Remo het abgmacht mit ihm wieder e ängere Kontakt uf ds`baue.
Dr Polizei si mier sehr dankbar, dass si üs hei a d Unfallstell grüeft, dass si mier hei e Mitarbeiter zur Verfüegig gstellt für mier z`hälfe. Eso hani sälber chönne de Remo bärge u ihn mit dr Hilf vom Bestattigsinstitut yzlade und vom Chrattiggrabe la wägtransportiere.
Mit dr Polizei hani alli persönliche Sache zämegläse u de i üses Auto glade. Ds`Strasseinspektorat isch cho putze u scho bald het mer nüt me gseh was da die letschte 2 Stund abglaufe isch. I ha de de Chrattiggrabe verlah und bi zum Uschi u zum Marco ufe Stützpunkt Gesige gfahre. Alli am Ysatz beteiligte Lüt si awäsend gsi u es isch tröstlich gsi wie si üs alli hei id d`Arme gno u hei versucht üs echli Chraft zgäh.
Isch es Traum oder isch das alles wahr, was mier i de letschte Stunde hei erläbt?….. Mier si nid erwachet u es isch e kei Traum gsi. Eso si mier am sibni am Morge ds`erscht mal am Remo sinere Unfallstell verbie gfahre, u hei versucht das alles z`ordne u üs Gedanke zmache wie mier das de Verwandte, de Fründe u em Lehrmeister sölle mitteile? Es isch Silväster gsi u mier hei so vilne liebe Mönsche die truurigi Botschaft müesse säge.
Gli si die erschte Fründe zu üs cho u hei üs versucht mit emene Cherzli u mit ere Umarmig echli Trost u Chraft zpände. Im Remo si Götti Dani het mier gholfe aues was im Auto isch gsi verruume u ds`sortiere, es isch e schwäri Ufgab gsi aber mit eme Fründ isch es einigermasse erträglich gsi.
Bis am Mittag hei mier scho vili Lüt chönne infomiere u hei ou de Tag vom Abschied im grobe organisiert gha.
Dr Remo isch vor Unfallstell ids Spital Interlake gfahre worde, wo är no us richterliche Gründe het müesse vom Amtsarzt undersuecht wärde. Mit em Hans Schild hani chönne dr Remo für de letscht Wäg uf Grindelwald u für d`Ufbahrig vorbereite. E unheimlich schwäri Ufgab isch das gsi, aber i ha das sälber wölle mache u bi sehr dankbar dass i das ha gmacht u dass dr Hans mier het gholfe. Eso hei mier de Remo, i sine Lieblingschleider chönne mit uf Grindelwald näh. Chum isch dr Remo ds`Grindelwald acho isch är mit sine Lieblingsblume, de Orchidee, gschmückt worde.
Uzähligi Stunde hei mir elei, mit de Familie, mit üsne und em Remo sine Fründe am offene Sarg vom Remo Abschied gno. De Marco und d`Andrea u im Remo siner ängschte Fründe hei de Ufbahrigsruum sehr schön gschmückt u hei e ganz spezielli, mit Musik umrahmti Atmosphäre gschaffet. Alli wo bim Remo i däm Ruum si gsi hei öppis vo däm spezielle gmerkt, was dr Remo für üs u siner Fründe bedüdet het. Sehr vili si i däm Ruum sehr truurig gsi u hei vil Träne verlore, aber vor allem siner Fründe si immer wieder ganz ruehig use cho u si danbar gsi, dass si persönlich no einisch es paar Momänte elei hei dörfe bi ihm si. Ds`Uschi u i hei ihn dert viel gstrychlet u ihm unzählige mal gseit, dass mier ihn lieb hei u ihn i üsem Härz ganz fescht tüe ybette, u dass mier unvorstellbar truurig sige ihn nümme eso chöi i d`Arme näh wie mier üs das sid 20 Jahr si gwohnet gsi. Sini Wort, sini spezielle Art, sini ganz spezielle Umgangsforme het nur sis Mami i allne Nüance kennt. Für si isch es am schwärste vo ihrem jüngste „Bueb“eso früe Abschied z`näh. E Abschied vo dere Wält wo mier ihn nümme chöi geseh.
Am Abe vor dr Beärdigung si mier bereit gsi de Remo am nächste Tag ganz los zlah u si Körper dr Natur ds`übergäh. Mier als Familie hei gwüsst dass es eso guet isch. Es isch üs bewusst gsi, dass es schwär wird wärde und mier vil Zyt wärde bruuche mit däm allem fertig zwärde.
Unvorstellbar vil Chraft hei üs als Familie die vile, vile Lüt gä wo a dr Abdankig hei teil gno. Die vile junge Lüt usem Umfäld vom Remo, die vile Fründe vor Andrea, em Marco und üs als Eltere het üs überwältiget. Die vile Blueme wo si em Remo hei ids Grab gleit isch üs unvergässlich. Au di vile liebe Wort a däm Tag hei üs Chraft gä.
Mier hei aber au gwüsst, dass es bald wird sehr still wärde um üs, und dass mier nid e eifachi Zyt wärde vor üs ha. Eso isch es Abe worde und uviel Cherzli hei bim Remo sim „Gärtli“ u bi üs dehei brönnt und hei üs Liecht vor Hoffnig gspändet.
Uzähligi Mal si mier i däm Jahr bim Remo sim Gärtli gsi u hei vil Cherzeliechtli gmacht, eso dass fast nie isch dunkel gsi bi ihm.
E bsundere Tag isch de 21. Geburtstag gsi im April 2004. Ds`Uschi u i hei üs vil Zyt gno, de Tag ganz bsunders verbringe. Zäme hei mier üs immer wieder i d`Arme gno u hei enand Chraft gä wider ufzstah und üse Wäg wieter z`ga. Dr Remo mit siner eimalige Art fählt üs allne unbeschriblech fesch!
Won i im Herbst 2003 ha wölle mi Töff, de Shadow itusche, het mi dr Remo drum bäte de Shadow z`bhalte. Aer möchte ne de mit füfezwänzgi sälber fahre. So lang het är wölle do druf warte. I ha ihm de Wunsch wölle erfülle u ha di spezielli Maschine bhaltet. Remo i fahre de Töff i bsunderer Errinnerig a di!
Am 6. Januar, es isch dr erscht Jahrestag vo Remos Beärdigung gsi, bi i, bevor i itz Spital bi go schaffe no es paar Cherzli uf em Remo sim Grab go azünde. Es het liecht grägelet u entsprechend glatt isches uf dr Strass gsi. I bi vorsichtig gfahre, u wos de ds`Zweilütschine richtig grägnet het hani chälti vom Bode underschätzt u bi churz vor dr Fischzucht is schleudere cho u ha e häftige, sytliche Ufprall amene Baum gha. I ha es ganzes Heer vo Schutzängle gha, dass i nid schlimmer bi verletzt worde.
Remo, i ha sälber erfahre wie schnäll dass es im Läbe cha gha. Worum dass i ha chönne am Läbe bliebe u du hesch müesse ga chan i nid beantworte. I weiss aber, dass hinder dere ganze Gschicht e tüfere Sinn isch, wo mier irgend einisch wärde verstah. Remo i bliebe no echli uf dere Syte vom Läbe, u i bi sicher, dass es dier uf dr andere Syte guet geit. I ha di ulieb u i vermisse di itz no viel meh.
I ewiger Liebi di Daddy